Kvika banki hf.: Bráðabirgðatölur - 1. ársfjórðungur 2020

Í samræmi við það sem kynnt var á aðalfundi félagsins þann 26. mars síðastliðinn hefur stjórn bankans ákveðið að birta bráðabirgðatölur úr uppgjöri bankans fyrir 1. ársfjórðungs 2020 sem kynntar voru á stjórnarfundi í dag þann 21. apríl.

Helstu atriði úr bráðabirgðauppgjöri 1. ársfjórðungs 2020

• Áætlaður hagnaður fyrir skatta á fjórðungnum var 446 milljónir króna
• Áætlað eiginfjárhlutfall var 24,2%
• Lausafjárþekja (LCR) var 275%
• Áætlaðar heildareignir námu 117,1 milljörðum króna
• Handbært fé og innstæður í Seðlabanka námu 48,1 milljörðum króna
• Útlán til viðskiptavina námu 30,9 milljörðum króna

Hagnaður fyrir skatta 446 milljónir króna

Hagnaður Kviku banka hf. fyrir skatta á fyrstu þremur mánuðum ársins 2020 er áætlaður 446 milljónir króna sem er lítillega yfir áætlun tímabilsins.

Lausafjárhlutfall var 275% í lok mars samanborið við 246% í lok árs 2019 og var langt umfram kröfur eftirlitsaðila um 100% lágmarksþekju. Áætlað eiginfjárhlutfall í lok mars var 24,2% að teknu tilliti til 25% arðgreiðslustefnu, samanborið við 24,1% í lok árs 2019 og var vel umfram 20,6% eiginfjárkröfu eftirlitsaðila sem síðast var uppfærð þann 18. mars 2020.

Útlán til viðskiptavina voru um 26,4% af efnahag bankans og námu 30,9 milljörðum í lok mars. Líkur eru á að COVID-19 faraldurinn muni leiða til greiðsluerfiðleika hjá einhverjum lántökum. Gæði útlánasafns eru m.a. metin samkvæmt IFRS 9 uppgjörsstaðlinum og gefur til kynna þrepaskipt gæði útlána. Í lok mars voru 13,8% af útlánum í þrepi 2 og þrepi 3 sem er aukning frá 31.12.2019 eins og sjá má í neðangreindri töflu.

                                                                       31.3.2020                   31.12.2019

Þrep 1                                                            77,4%                         81,3%

Þrep 2                                                            12,0%                         10,0%

Þrep 3                                                           1,8%                           1,0%

Gangvirði í gegnum rekstur                       8,8%                           7,7%

Gjaldfærð virðisrýrnun útlána og neikvæðar gangvirðisbreytingar á útlánasafni eru áætlaðar 165 milljónir króna á fyrstu þremur mánuðum ársins en það er rúmlega tvöföld gjaldfærsla tímabilsins í fjárhagsáætlun.

Árshlutareikningur Kviku banka hf. fyrir fyrsta ársfjórðung verður birtur þann 14. maí 2020. Gildandi afkomuspá var samþykkt og birt í janúar sl. Ákveðið hefur verið að endurmeta helstu  forsendur spárinnar, þar með talið áætlaða stækkun lánabókar. Greint verður frá niðurstöðu endurmats á afkomuspá samhliða birtingu uppgjörs fyrir fyrsta ársfjórðung.