Festi hf.: Skipulagsbreytingar hjá samstæðunni

Í dag taka gildi skipulagsbreytingar innan samstæðu Festi. Nýr framkvæmdastjóri N1 hefur verið ráðinn og tvær framkvæmdastjórastöður í Festi sameinaðar. Í þessum breytingum kveðja sjö starfsmenn sem fylgt hafa félaginu lengi og er þeim þakkað góð störf á liðnum árum. Tveir nýir eru ráðnir til starfa.

„Breytingarnar eru hluti af stefnumörkun félagsins um að létta á móðurfélaginu og efla enn frekar sjálfstæði hvers félags innan Festi. Skerpa fókus til aukins vaxtar og tryggja að fjárfestingum félagsins sé stýrt til réttra tækifæra og aukinnar verðmætasköpunar,“ segir Ásta S. Fjeldsted, forstjóri Festi.

Ýmir Örn Finnbogason hefur verið ráðinn framkvæmdastjóri N1 og tekur við starfinu 1. júní nk.

Hinrik Örn Bjarnason, sem starfað hefur innan framkvæmdastjórnar N1 frá 2013 og þar af sem framkvæmdastjóri félagsins frá ársbyrjun 2019, hefur látið af störfum. „N1 stendur á tímamótum með breyttri neysluhegðun og umbreytingu í orkuskiptum. Við þökkum Hinriki fyrir hans mikilvæga starf í vegferð N1 undanfarin ár um leið og við bjóðum Ými velkominn sem fær það hlutverk að taka enn stærri skref í að mæta þeim umbreytingum sem eru að eiga sér stað á markaðnum. Við hlökkum til þess að fá jafn framsækinn og öflugan mann og Ými í brúna,“ segir Ásta S. Fjeldsted, forstjóri Festi.

Ýmir Örn Finnbogason kemur frá Deloitte þar sem hann var yfirmaður viðskiptagreiningar frá 2021 og áður sérstakur fjármálaráðgjafi sjávarútvegsfyrirtækja í þjónustu Deloitte á árunum 2010-2012. Hann starfaði áður sem fjármálastjóri Plain Vanilla Games og Teatime Games. Þar áður starfaði hann sem forstjóri Rammagerðarinnar árin 2004-2006. Ýmir Örn er með meistaragráðu í reikningshaldi og fjármálum frá Cass Business School í London og Bachelor gráðu í viðskiptafræði frá HR.

„Ég er afar spenntur fyrir því að ganga til liðs við N1, fyrirtæki sem stendur frammi fyrir miklum breytingum. Ég er þess fullviss að í þeim liggja fjölmörg tækifæri sem og í auknu samstarfi við önnur félög innan Festi. Ég er þakklátur fyrir traustið og hlakka til að taka þátt í að móta framtíð N1, fyrirtæki með einstaka sögu og gríðarlega sterkan og fjölbreyttan hóp starfsfólks og viðskiptavina“, segir Ýmir Örn Finnbogason.

Þá eru það stór tímamót að Kolbeinn Finnsson, sem gegnt hefur starfi framkvæmdastjóra rekstrarsviðs Festi, lætur nú af störfum. Magnús Kr. Ingason framkvæmdastjóri fjármálasviðs Festi tekur nú við sameinuðu sviði fjármála og rekstrar.

Kolbeinn hefur starfað hjá félaginu í hartnær 35 ár en hann hóf fyrst störf á fjármálasviði Olíufélagsins hf. árið 1987. Kolbeinn var deildarstjóri hagdeildar, síðar mannauðsstjóri og hefur setið óslitið í framkvæmdastjórn félagsins frá árinu 2002. „Við þökkum Kolbeini Finnssyni fyrir vel unnin störf og einstaka samfylgd með félaginu í gegnum miklar breytingar á undanförnum árum,“ segir Ásta S. Fjeldsted, forstjóri Festi.

Dagný Engilbertsdóttir hefur verið ráðin forstöðumaður stefnumótunar á skrifstofu forstjóra og tekur til starfa 1. september nk. Dagný mun styðja við stefnumótun móðurfélagsins og þau verkefni sem eru á borði forstjóra. Dagný kemur frá stærsta orkufyrirtæki Danmerkur, Örsted, þar sem hún hefur starfað sem verkefnastjóri stefnumótunar. Hún var áður ráðgjafi hjá McKinsey & Company í Kaupmannahöfn á árunum 2019-2021.

Fyrirspurnir beinist til forstjóra Festi, Ástu S. Fjeldsted,