Festi hf.: Söluferli á Olíudreifingu ehf. hætt

Í tilkynningu Haga hf., sem birt var eftir lokun markaða í dag þann 30. apríl 2025, var upplýst um að félagið hefði tekið ákvörðun um að hætta formlegri sölumeðferð á eignarhlutum Olís í Olíudreifingu ehf. Með vísan til þeirrar tilkynningar, meðal annars, eru skilyrði til að halda áfram sölumeðferð eignarhluta Festi í Olíudreifingu ehf. ekki fyrir hendi og formlegri sölumeðferð þeirra því sjálfhætt.

“Þó ekki hafi tekist samningar um sölu á þessum tíma þá hefur ferlið skerpt sýn okkar í Festi á stöðu og tækifæri Olíudreifingar til framtíðar.   Olíudreifing stendur styrkum fótum með öfluga stjórnendur og stöðugan rekstur og er Festi fullvisst um að félagið sé tilbúið til að grípa tækifærin framundan sem í orkuskiptunum felast.

Við viljum þakka þeim sem tóku þátt í söluferlinu, tilboðsgjöfum, stjórnendum Olíudreifingar sem og ráðgjöfum okkar í Íslandsbanka fyrir áhugann og gott samstarf,” segir Ásta S. Fjeldsted, forstjóri Festi. 

Olíudreifing er 60% í eigu Festi og 40% í eigu Olís. Félagið er mikilvægt innviðafélag hvað varðar birgðahald og dreifingu á eldsneyti á Íslandi.

Þessar upplýsingar eru birtar í opinberlega samræmi við upplýsingaskyldu Festi hf. skv. reglugerð Evrópusambandsins um markaðssvik nr. 596/2014 (MAR), sbr. lög nr. 60/2021 um aðgerðir gegn markaðssvikum. Upplýsingarnar varða lok söluferlis á eignarhlutum í Olíudreifingu ehf. sem töldust fela í sér innherjaupplýsingar í skilningi 7. gr. MAR. Tilkynning þessi er gerð opinber af Magnúsi Kr. Ingasyni, fjármálastjóra Festi hf., í samræmi við upplýsingaskyldu félagsins samkvæmt MAR og 2. gr. framkvæmdarreglugerð framkvæmdastjórnarinnar (EU) 2016/1055.