Hagar hf.: Söluferli á eignarhlutum Olís í Olíudreifingu ehf. hætt

Í tilkynningu frá Högum, þann 3. desember 2024, var greint frá því að óskuldbindandi tilboð hefðu borist í eignarhlut Olís, dótturfélags Haga, í Olíudreifingu ehf. (ODR). Í kjölfarið var þremur aðilum veittur frekari aðgangur að gögnum og boðið að skila inn uppfærðum óskuldbindandi tilboðum.

Allir þrír aðilar skiluðu uppfærðum tilboðum í 40% eignarhlut Olís í ODR. Tilboðin reyndust vera undir væntingum um virði félagsins, og hafa Hagar því ákveðið að hætta söluferli á eignarhlut sínum í ODR.     

Finnur Oddsson, forstjóri Haga hf.:

„Á þeim tíma sem söluferli ODR hefur staðið yfir hafa markaðsaðstæður félagsins styrkst og sömuleiðis rekstur, sem gengur vel. Við metum það svo að eftirspurn eftir jarðefnaeldsneyti verði áfram sterk, eins og hækkun orkuspár gefur til kynna. Félagið býr að sterkum innviðum og þrautreyndum, öflugum hópi stjórnenda og starfsfólks og er þannig í ákjósanlegri stöðu til að nýta tækifæri sem felast í þjónustu með framtíðar orkugjafa samhliða orkuskiptum. Hjá Högum og Olís munum við sem eigendur og viðskiptavinir styðja ODR áfram í að treysta enn frekar þjónustu og rekstur og það mikilvæga hlutverk sem félagið gegnir þegar kemur að orkuinnviðum landsins, nú og til framtíðar.  

Þeim sem tóku þátt í söluferli ODR og studdu við það þökkum við áhugann og gott samstarf.“

Fyrir frekari upplýsingar vinsamlegast hafið samband við Finn Oddsson, forstjóra Haga, á netfangið .

Olíudreifing er 40% í eigu Olís og 60% í eigu Festi. Félagið er mikilvægt innviðafélag hvað varðar birgðahald og dreifingu á eldsneyti á Íslandi.