Fly Play hf.: Besta sætanýting í sögu félagsins

Flugfélagið PLAY flutti 187.960 farþega í ágúst 2024, sem er 1,8% aukning frá ágúst í fyrra þegar félagið flutti 184.926 farþega. Sætanýtingin í nýliðnum ágústmánuði var 91,6%, sem er met í einum mánuði hjá PLAY. Er um að ræða 2,7% aukningu frá ágúst í fyrra þegar sætanýtingin var 88,9%.

PLAY flaug til 32 áfangastaða í ágúst en af þeim voru 22 með yfir 90% sætanýtingu. Á sama tíma og félagið náði metsætanýtingu var stundvísi félagsins 91,5% sem er umtalsvert hærra en hjá helstu samkeppnisaðilum félagsins. PLAY hefur nú verið stundvísasta félagið sem flýgur frá Keflavíkurflugvelli 13 mánuði í röð.

Af þeim farþegum sem flugu með PLAY í ágúst voru 25,9% á leið frá Íslandi, 35,6% voru á leið til Íslands og 38,5% voru tengifarþegar (VIA).  PLAY heldur áfram að bæta við sig hlutdeild á heimamarkaði. 48.694 farþegar flugu með félaginu frá Íslandi í ágúst 2024, samanborið við 41.112 farþega í ágúst 2023, sem er 18,4% vöxtur á milli ára.

Nýir áfangastaðir og jákvæð áhrif á íslenskt samfélag

PLAY hóf miðasölu til tveggja áfangastaða í ágústmánuði, annars vegar Faro í Potúgal og hins vegar Álaborg í Danmörku. Faro er fjórði áfangastaður PLAY í Portúgal en Álaborg sá þriðji í Danmörku. Þar að auki hefur PLAY tilkynnt að flugfélagið muni fjölga ferðum til Vilníus á næsta ári, úr einni ferð í viku upp í tvær ferðar á viku.

Þá var tilkynnt nýlega að PLAY er það flugfélag sem Íslendingar telja að hafi jákvæðustu áhrifin á íslenskt samfélag með rekstri sínum.. Þessi viðurkenning er niðurstaða rannsóknar sem fyrirtækið Prósent gerði með því að leggja spurningar fyrir úrtakshóp sem taldi 15.000 manns. PLAY fékk þar afbragðseinkunn upp á 73 og var á toppnum yfir íslensk flugfélög og í sjöunda sæti yfir öll fyrirtæki á landinu.

Einar Örn Ólafsson, forstjóri PLAY:

„Við erum svakalega stolt af þessari metsætanýtingu í ágúst. Þetta sýnir að það er tekið vel í þá þjónustu sem við bjóðum upp á þeim mörkuðum sem við störfum og að eftirspurnin hefur tekið við sér. Þetta afrek er sérstaklega eftirtektarvert því við náum því í ágústmánuði sem getur reynst snúinn í sölu því flestir eru aftur komnir í rútínu eftir sumarfrí. Þrátt fyrir það náðum við að fá fleiri í flugvélarnar okkar og auka þar með sætanýtinguna.

Við erum einnig ánægð að sjá að farþegum sem fljúga til landsins fjölgar á milli ára og að talsverð aukning er á farþegum sem fljúga með okkur frá Íslandi. Þetta er staðfesting á því að íslenski markaðurinn er ánægður með okkar þjónustu og að ákvörðun okkar um að bjóða upp á frábært úrval af sólarlandaáfangastöðum er að borga sig.

Ofan á allt þetta var stundvísi okkar í ágústmánuði 91,5 prósent, sem er stórbrotið afrek hjá samstarfsfólki mínu. Þetta þýðir að þrettánda mánuðinn í röð er PLAY stundvísasta flugfélagið, með mikil umsvif, sem flýgur frá Keflavíkurflugvelli. Þegar litið er til næstu mánaða er bókunarstaðan okkar betri en á sama tíma í fyrra og ég get ekki annað en verið fullur eftirvæntingar fyrir komandi tímum.“

Viðhengi