Fly Play hf.: Um 109 þúsund farþegar og 86,9% sætanýting

Um 109 þúsund farþegar og 86,9% sætanýting

PLAY flutti 108.622 farþega í ágúst. Það er sambærilegur fjöldi farþega og í júlí þegar 109.937 farþegar flugu með PLAY.

Sætanýting í ágúst nam 86,9 prósentum samanborið við 87,9 prósent í júlí og 79,2 prósent í júní. Þróunin er áfram sérstaklega jákvæð, sem helgast einkum af tengiflugi PLAY yfir Atlantshafið á milli áfangastaða í Evrópu og Bandaríkjunum.  

Í sumar ruddi PLAY sér til rúms á fjölda nýrra markaða með afgerandi hætti. Félagið styrkti einnig stöðu sína enn frekar á áfangastöðum þar sem starfsemi var hafin. Tengiflugsleiðakerfi PLAY er nú komið á fullan skrið sem hefur haft afar jákvæð áhrif á reksturinn, meðal annars með bættri sætanýtingu og lækkandi einingakostnaði.

Óhætt er að segja að bókunarstaðan fyrir haustið og veturinn sé góð. Hún er talsvert betri en á sama tíma á síðasta ári.

PLAY var með 89 prósenta stundvísi í ágúst. Það er frábær árangur sem má þakka fagmennsku og yfirgripsmikilli reynslu flugrekstrarteymisins.







Hátt í þúsund umsóknir á einni viku og nýr áfangastaður í Bandaríkjunum







PLAY hóf miðasölu á flugi til flugvallarins Dulles Washington (Dulles International Airport) í Bandaríkjunum í ágústmánuði. Fyrsta flug PLAY til Dulles Washington verður 26. apríl 2023. Þetta er fjórði áfangastaður félagsins í Bandaríkjunum en PLAY verður eina lággjaldaflugfélagið sem tengir flugvöllinn við Evrópu.







Í upphafi mánaðar auglýsti PLAY eftir um 150 flugliðum og 55 flugmönnum fyrir næsta vor. Þetta verður stærsta ráðning félagsins í einu vetfangi en hún er í takt við stóraukin umsvif PLAY sem mun taka fjórar nýjar flugvélar í notkun næsta vor. Á fyrstu vikunni höfðu hátt í þúsund manns sótt um.







„Eftir hraða en örugga uppbyggingu með fjölda nýrra áfangastaða, innleiðingu tengiflugsleiðakerfis og móttöku flugvéla er rekstur PLAY loks kominn í fastar skorður. Viðskiptamódelið er orðið að veruleika. Enn og aftur er ég er sannarlega stoltur af starfsfólki PLAY sem hefur gert þetta mögulegt. Það eru bjartir tímar framundan og bókunarstaðan er sterk. Fyrir tveimur vikum hófum við miðasölu til Dulles Washington flugvallar sem er lykiláfangastaður í Bandaríkjunum. Þegar í stað var eftirspurnin mikil og bókanir fyrir næsta sumar eru strax umfram væntingar. Stóru verkefnin í vetur er að taka á móti nýjum flugvélum sem bætast við flotann og ráðningar á nýjum áhöfnum,“ segir Birgir Jónsson, forstjóri PLAY. 

Viðhengi