Fyrri hluti árs 2021 betri en áætlað var hjá PLAY

Fyrri hluti árs 2021 betri en áætlað var hjá PLAY

• Flugrekstur hafinn af öryggi og hagkvæmni
• Handbært fé frá rekstri og sjóðsstaða félagsins sterkari en ætlað var
• Leiga á sex nýjum flugvélum tryggð. Flotinn stækkar í tíu vélar á betri kjörum en ráðgert var
• Eftirspurn eftir flugi vaxandi og jákvæðar horfur
• Rúmlega 17.300 farþegar í ágúst, nærri tvöfalt fleiri en í júlí
• Undirbúningur fyrir flug til Norður-Ameríku og tengiflug næsta vor gengur vel 

Annar ársfjórðungur PLAY hefur byggt góðan grunn að vexti félagsins. Áhersla var á tæknilega innviði, þjónustugetu og að afla nauðsynlegra rekstrarleyfa. Í apríl aflaði PLAY USD 47,0 milljóna í lokuðu hlutafjárútboði og í júní hófst reglulegt áætlunarflug þriggja flugvéla félagsins. Vélarnar eru leigðar á hagstæðum kjörum og er til skamms tíma einungis greitt fyrir þann tíma sem vélinni er flogið.

Eftir að flugrekstrarleyfið var í höfn hófst sala farmiða sem gekk vonum framar og sumaráætlun félagsins var vel heppnuð.

PLAY styrkti enn frekar stoðir sínar með USD 34,9 milljóna hlutafjárútboði í júní og félagið var skráð á Nasdaq First North Growth Iceland markaðinn þann 9. júlí.

Árshlutauppgjör annars ársfjórðungs endurspeglar vel heppnaða byrjun flugrekstrar PLAY. Handbært fé frá rekstri er meira en áætlanir gerðu ráð fyrir þar sem meðal annars kjör færsluhirða eru betri en ráðgert var. Betri kjör má rekja til sterkrar fjárhagsstöðu fyrirtækisins og vel heppnuðu upphafi rekstrar.

Rúmlega 17.300 farþegar í ágúst, nærri tvöfalt fleiri en í júlí

Fyrsti heili mánuður PLAY í flugrekstri var vel heppnaður og markmið fyrirtækisins um öryggi, áreiðanleika og ánægju viðskiptavina náðust. Tíðar breytingar á ferðatakmörkunum af hálfu stjórnvalda og ný bylgja kórónuveirunnar hér á landi í júlí hafði þó óneitanlega neikvæð áhrif á eftirspurn meðal íslenskra farþega. Viðskiptavinir nýttu sér hins vegar sveigjanlega breytingaskilmála og endurskipulögðu ferðalög sín í nokkrum mæli. Fyrir PLAY þýddi þetta flutning en ekki tap á tekjum. Í júlí flutti félagið 9.899 farþega og sætanýting var 41,7%.

Ágúst sýndi jákvæð teikn og miðasala jókst á ný. Sætanýting í ágúst var 46,4% og PLAY flutti rúmlega 17.300 farþega, nærri tvöfalt fleiri en í júlí. Tölurnar endurspegla vaxandi eftirspurn íslenskra viðskiptavina í kjölfar fækkandi COVID-19 tilfella. Útlit er fyrir að sætanýting í september muni aukast enn frekar, annan mánuðinn í röð.

Flotinn stækkar í tíu flugvélar á betri kjörum en ráðgert var 

PLAY undirritaði í ágúst tvær viljayfirlýsingar við tvo alþjóðlega flugvélaleigusala. Þessar ráðstafanir stækka flota PLAY úr þremur flugvélum í níu fyrir sumarið 2023. Þá er félagið langt á veg komið í viðræðum um leigu á tíundu flugvélinni. Kjör á þessum samningum eru betri en gert var ráð fyrir í viðskiptaáætlunum félagsins.

Fyrri viljayfirlýsingin er vegna tveggja nýrra A320neo flugvéla af 2020 árgerðinni. Flugvélarnar verða afhentar á fyrsta ársfjórðungi 2022.

Seinni viljayfirlýsingin er vegna þriggja A320neo flugvéla og einnar A321neo sem koma í rekstur vorið 2023. Vélarnar eru nýjar og verða afhentar beint frá Airbus fyrir milligöngu flugvélaleigusalans.



Þessar ráðstafanir gera PLAY kleift að nýta hagstæð kjör sem bjóðast við núverandi markaðsaðstæður vegna COVID-19. PLAY verður þannig með sex flugvélar í flotanum vorið 2022 þegar félagið hefur flug vestur um haf.

Þá standa yfir viðræður um viðbætur við flotann fyrir 2024 og 2025 en hann mun telja 15 vélar í lok árs 2025.

Tengiflug stórt skref



Niðurstöður annars ársfjórðungs sýna vel að allt er á áætlun hjá PLAY fyrir VIA viðskiptamódelið (tengiflug) sem til stendur að hefjist vorið 2022. Forgangsmál næstu mánaða verður undirbúningur fyrir flug PLAY til Norður-Ameríku. 

Hjá PLAY starfa í dag 131 starfsmaður en uppbyggingin mun krefjast 150 til 200 starfsmanna til viðbótar.

Streymi frá fjárfestakynningu, 1. september 2021

PLAY mun kynna uppgjör sitt á opnum kynningarfundi sem hefst klukkan 8:30 þann 1. september 2021. Þar munu Birgir Jónsson forstjóri og Þóra Eggersdóttir, fjármálastjóri PLAY, kynna uppgjörið og svara spurningum að því loknu. Kynningunni verður streymt hér: .

Viðhengi