Samherja Holding veitt undanþága frá tilboðsskyldu í Eimskip

Eimskip hefur móttekið eftirfarandi tilkynningu frá Samherja Holding ehf.:

„Fjármálaeftirlit Seðlabanka Íslands hefur í dag ákveðið að veita Samherja Holding undanþágu frá tilboðsskyldu í Eimskipafélag Íslands hf., enda telur eftirlitið að núverandi aðstæður á fjármálamarkaði í ljósi Covid-19, bæði hér á landi og í heiminum öllum, séu með þeim hætti að skilyrði 5. mgr. 100. gr. verðbréfaviðskiptalaga um sérstakar aðstæður séu uppfyllt.

Fjármálaeftirlitið telur að verndarhagsmunir yfirtökureglna laganna séu tryggðir og að með veitingu undanþágu frá tilboðsskyldu sé, eins og atvikum málsins er háttað, ekki gengið á minnihlutavernd annarra hluthafa. Að endingu vekur fjármálaeftirlitið athygli á því að skv. 4. mgr. 102. gr. verðbréfaviðskiptalaga er Samherja Holding ekki heimilt að leggja fram yfirtökutilboð í sex mánuði frá því að félagið lýsti því yfir að það hygðist ekki gera yfirtökutilboð.

„Það eru mjög sérstakar og óvenjulegar aðstæður á fjármálamarkaði. Við töldum því ekki skynsamlegt að tilboð um yfirtöku færi fram í skugga þessa umróts en við vonum að aðstæður verði heppilegri síðar. Eins og við höfum sagt áður þá hefur trú okkar á framtíð Eimskips ekkert breyst,“ segir Björgólfur Jóhannsson, forstjóri Samherja Holding.“