75% sætanýting, 42% aukning í farþegafjölda og eftirspurn að taka við sér á ný

75% sætanýting, 42% aukning í farþegafjölda og eftirspurn að taka við sér á ný

Flugfélagið PLAY flutti 107.236 farþegar í liðnum nóvember mánuði sem er 42% aukning á milli ára, en félagið flutti 75.396 farþega í nóvember 2022. Sætanýtingin í nóvember 2023 var 74,5%, samanborið við 79% í nóvember í fyrra. Þetta lægra hlutfall nýttra sæta er afleiðing jarðhræringa á Reykjanesskaga sem leiddu til mikillar fjölmiðlaumfjöllunar á heimsvísu þar sem leiddar voru að því líkur að mögulegt eldgos gæti truflað flug. Þessir atburðir höfðu mikil áhrif á eftirspurn eftir ferðum til Íslands sem bókaðar eru með skömmum fyrirvara.

Þrátt fyrir samdrátt í sætanýtingu í mánuðinum er enn vöxtur á milli ára í einingatekjum jafnvel þótt á sama tíma hafi framboð á sætiskílómetrum aukist um 54%.

Meðalhliðartekjur halda áfram að hækka hjá PLAY en þær voru 30% hærri í nóvember í ár samanborið við nóvember 2022. Þegar litið er fram á við er áætlað að meðalhliðartekjur muni halda áfram að aukast hjá félaginu.

Af öllum þeim farþegum sem PLAY flutti í nóvember 2023 voru 26,2% á leið frá Íslandi, 32,7% voru á leið til Íslands og 41,2% voru tengifarþegar (VIA).

Í liðnum nóvembermánuði var PLAY með stundvísi upp á 88,9%.

Það sem af er ári hefur PLAY flutt 1,4 milljónir farþega. Sætanýting á árinu er 84%. Af þeim farþegum sem PLAY hefur flutt á árinu voru 26,9% á leið frá Íslandi, 32,6% voru á leið til landsins en 40,5% voru tengifarþegar (VIA).

Metsöludagur í nóvember

Jarðhræringar á Reykjanesskaga höfðu ótvíræð áhrif á eftirspurn hjá flugfélaginu, sér á lagi eftirspurn eftir ferðum til Íslands nú í aðdraganda jóla. Þegar hægðist á jarðhræringum á Reykjanesskaga mátti sjá skýr merki um að eftirspurnin hefði tekið við sér því félagið sló eigið sölumet á einum degi í síðustu vikunni í nóvember. Metsöludagurinn átti sér stað í kringum stóru árlegu söludagana Black Friday, Cyber Monday og Travel Tuesday. Þessi aukna eftirspurn mun þó ekki ná að bæta upp þann skaða sem varð af neikvæðu áhrifunum á eftirspurnina vegna jarðhræringanna til skamms tíma.

Birgir Jónsson, forstjóri PLAY:

„Ógnarmáttur náttúrunnar á Íslandi hafði ótvíræð áhrif á sætanýtingu okkar í nóvember. Fregnir í erlendum fjölmiðum af jarðskjálftum og mögulegu eldgosi rötuðu víða. Grindavíkurbær var rýmdur með skömmum fyrirvara og Bláa lóninu, einu þekktasta kennileiti Íslands, hefur verið lokað tímabundið vegna þessarar vár. Ekki verður efast um áhrifin sem þetta hefur haft á eftirspurn eftir ferðum til Íslands. Það sést á sætanýtingu í nóvembermánuði og mun áhrifanna einnig gæta í desember.



Við höfum þó séð eftirspurnina taka við sér á síðustu dögum, sem er traustvekjandi fyrir komandi mánuði, en aðeins of seint til að bæta stöðuna til skamms tíma nú í aðdraganda jóla og fyrir nýja árið. Ísland er þó öruggur áfangastaður og þessar jarðhræringar hafa ekki haft áhrif á flugáætlun PLAY.



Svo virðist sem dregið hafi úr jarðhræringunum og við hjá PLAY  vonumst til að það boði betri tíma fyrir Grindavíkurbæ. Margt af okkar samstarfsfólki og vinum býr þar. Okkar von er sú að þessi mál leysist sem fyrst fyrir Grindvíkinga svo þeir geti farið að horfa fram á við og að þessi frábæri bær nái aftur sínu fyrra horfi.



Ég vil einnig nýta tækifærið og þakka mínu frábæra samstarfsfólki há PLAY fyrir þeirra framlag á þessum krefjandi tímum. Ég verð alltaf jafn stoltur af því að sjá hvernig þau nálgast hvert einasta verkefni af einstakri fagmennsku eins og þeim er tamt.

Viðhengi