Fly Play hf.: Metmánuður hjá PLAY sem flutti 110.000 farþega með 87,9% sætanýtingu

Metmánuður hjá PLAY sem flutti 110.000 farþega með 87,9% sætanýtingu

PLAY flutti 109.937 farþega í júlí, sem er 25 prósenta aukning frá mánuðinum áður þegar 87.932 farþegar flugu með PLAY. Fjöldi farþega í júlí 2022 er meiri en samanlagður fjöldi allra farþega sem PLAY flutti á árinu 2021. Sætanýting nam 87,9 prósentum í júlí samanborið við 78,2 prósent í júní og 69,6 prósent í maí.

Þessi hagfellda þróun helgast að mestu leyti af tengiflugi PLAY yfir Atlantshafið á milli stórborga í Evrópu og Bandaríkjunum. Félagið hefur rutt sér til rúms á nýjum mörkuðum með afgerandi hætti í vor og í sumar og styrkt stöðu sína enn frekar þar sem starfsemi var hafin. Júlímánuður markaði þau tímamót að hann var fyrsti mánuðurinn þar sem PLAY flaug á alla áfangastaði sem höfðu verið boðaðir í ár. Flogið var á sex Airbus-þotum til að þjónusta þessa 25 staði beggja vegna Atlantshafs.

PLAY var með 79 prósenta stundvísi í júlí sem telst mjög ásættanlegt sé litið til þess hve mörgum nýjum mörkuðum hefur verið bætt við og vegna krefjandi aðstæðna sem víða eru uppi vegna manneklu á flugvöllum erlendis.

Sex þotur í rekstri og tíu á næsta ári

Sjötta þota PLAY, Airbus A320neo, kom til Íslands um síðustu mánaðamót og flutti sína fyrstu farþega í júlí. PLAY er nú með þrjár Airbus A321neo og þrjár Airbus A320neo í rekstri, sem er í samræmi við rekstraráætlun og flotastefnu félagsins. PLAY fær fjórar A320/321 til viðbótar næsta vetur, sem mun gera fjölda Airbus-þota hjá félaginu tíu talsins vorið 2023.

„Það er frábært að sjá svona marga nýja áfangastaði og tengiflugið okkar yfir Atlantshafið á fullum afköstum. Leiðakerfið okkar er komið á fullan skrið og flytur sögulegan fjölda ánægðra viðskiptavina í hverjum mánuði. Í júlí vorum við á mjög góðri leið með stundvísina þrátt fyrir bagalegar aðstæður á flugvöllum. Við lítum á það sem afrek. Hver kostnaðareining (án eldsneytis) er enn undir fjórum bandarískum sentum, eldsneytisverð fer lækkandi, tekjueiningin fer hækkandi og bókunarstaðan er afar góð. Það hefur verið virkilega hvetjandi að fá að taka þátt í þessu ferli og verða vitni að þeim mikla liðsanda og fagmennsku sem einkennir alla mína samstarfsmenn. Allt þetta fyllir mig af eldmóði og eftirvæntingu fyrir komandi mánuðum og framtíð PLAY. Hún er björt,“ segir Birgir Jónsson, forstjóri PLAY."

Viðhengi