Fly Play hf.: Um 92 þúsund farþegar og 81,9 % sætanýting í október
Um 92 þúsund farþegar og 81,9 % sætanýting í október
PLAY flutti 91.940 farþegar í október og sætanýting var 81,9% samborið við 81,5% í september. Um 35 % voru farþegar á leið frá Íslandi, 28,5% voru farþegar á leið til Ísland og 36,3% voru tengifarþegar (VIA).
Almenn eftirspurn frá farþegum til Íslands hefur verið minni en búast mátti við á síðustu mánuðum þar sem mörg hótel voru uppbókuð og sömuleiðis bílaleigubílar. Afleiðing þess var aukinn fjöldi tengifarþega í stað farþega til Íslands, sem skila minni tekjum. Nú horfir hins vegar til framfara og PLAY sér aukna eftirspurn meðal farþega á leið til landsins á næstu mánuðum enda hefur íslensk ferðaþjónusta talsvert meira svigrúm til að taka við farþegum. Inneignum ferðamanna hjá öðrum ferðaþjónustuaðilum, sem fengust höfðu í faraldrinum og nýttar voru í
miklum mæli á þessu ári, hefur fækkað til muna. Ferðamálastofa spáir um 40% fleiri farþegum til landsins árið 2023 miðað við 2022 og PLAY sér ört vaxandi bókunarflæði til landsins inn í veturinn og næsta ár.
Stundvísi PLAY í október var 95,4%.
„Í síðustu viku kynntum við ársfjórðungsuppgjör PLAY fyrir þriðja ársfjórðung 2022 og lít ég á það sem sannkallað afrek að svo ungt fyrirtæki nái rekstrarhagnaði við þær ytri aðstæður sem við höfum stafað við. Meirihluti áfangastaða okkar var glærnýr í leiðakerfinu og vörumerki PLAY því að mestu óþekkt á mörkuðum. Sætanýtingin á Q3 var 85% sem er mjög ásættanlegt og við búumst við góðri sætanýtingu næstu mánuði. Það er líka mjög jákvætt að við erum þegar farin að sjá aukningu á farþegum til Íslands á næstu mánuðum. Okkar magnaði hópur starfsmanna er kominn á fullt við undirbúning þess að færa enn út kvíarnar. Við erum að ráða fólk, fjórar flugvélar eru á leið til okkar og áfangastaðir eru að bætast við. Ég horfi spenntur til framtíðar því PLAY er að verða sterkt og arðbært lággjaldaflugfélag með vaxandi tekjugrunn og ánægða viðskiptavini,“ segir Birgir Jónsson, forstjóri PLAY.
Viðhengi
