Festi hf.: Samkomulag um helstu skilmála vegna kaupa Festi á öllu hlutafé í Lyfju hf.

Festi hf. og SID ehf. undirrituðu í dag samkomulag sem tekur á helstu skilmálum vegna fyrirhugaðra kaupa Festi hf. á öllu útgefnu hlutafé Lyfju hf.

Festi sérhæfir sig í rekstri smásölufyrirtækja og rekur m.a. Krónuna, N1 og ELKO ásamt því að eiga og reka alls 87 fasteignir samtals um 95.000 fermetrar, víðs vegar um landið. Einnig rekur félagið tvö vöruhús undir nafni Bakkans vöruhótels sem sérhæfir sig í vöruhúsaþjónustu og dreifingu. Heildarvelta Festi var 131 milljarðar króna árið 2022.

Aðilar samkomulagsins munu í framhaldi af undirrituninni hefja samningaviðræður um kaupin með það að markmiði að komast að samkomulagi um efni endanlegs kaupsamnings.  Samningaviðræðurnar byggja á forsendum og skilmálum samkomulagsins sem undirritað var í dag, að teknu tillits til niðurstaðna áreiðanleikakönnunar kaupanda.

Samkomulagið felur í sér að heildarvirði Lyfju sé 7,8 milljarðar króna en endanlegt kaupverð hlutafjár mun ráðast af skuldastöðu félags við afhendingu ásamt gengi hlutabréfa í Festi á þeim tíma.  Áætlanir Lyfju fyrir árið 2023 gera ráð fyrir að hagnaður fyrir afskriftir, fjármagnsliði og skatta (EBITDA), án IFRS16 áhrifa nemi 1.044 milljónum króna.  Í samkomulaginu er gert ráð fyrir að greiða kaupverðið með afhendingu 10 milljón hluta í Festi eða 1,8 milljarða miðað við dagslokagengi Festi í Kauphöll og 6,0 milljarða með handbæru fé. 

Viðskiptin eru meðal annars háð skilyrðum (i) að samkomulag náist um endanlegan kaupsamning (ii) framkvæmd áreiðanleikakönnunar (iii) fjármögnun viðskiptanna (iv) að hluthafafundur kaupanda samþykki ráðstöfun hlutafjár vegna viðskiptanna (v) samþykki Samkeppniseftirlitsins.  Gangi viðskiptin eftir er gert ráð fyrir því að þeim ljúki á 1. ársfjórðungi 2024.

Nánar verður gerð grein fyrir viðskiptunum þegar kaupsamningur liggur fyrir.

Bætt þjónusta við viðskiptavini og lýðheilsa

„Kaupin eru hluti af framtíðarsýn Festi um að bjóða upp á breitt vöruúrval nauðsynjavara á hagkvæmu verði um allt land. Með sölu lyfja og lækningavara getum við betur þjónað viðskiptavinum okkar ásamt því að taka þátt í að stuðla að bættri lýðheilsu í landinu. Lyfja er traust fyrirtæki sem hefur lagt ríka áherslu á fræðslu og fyrirbyggjandi heilsuvernd. Þessi áhersla kallast á við framtíðarsýn félaga innan Festi. Með rótgrónu og sterku vörumerki Lyfju og því reynslumikla fagfólki sem þar starfar verður hægt að byggja enn eina sterka stoð innan samstæðu Festi.“ segir Ásta S. Fjeldsted, forstjóri Festi, sem mætti formlega aftur til leiks í dag eftir fæðingarorlof.