Alvotech skipar nýjan framkvæmdastjóra gæðamála

Alvotech (NASDAQ: ALVO) tilkynnti í dag að Christina Siniscalchi hafi verið skipuð tímabundið í stöðu framkvæmdastjóra gæðamála. Christina tekur við af Söndru Casaca, sem lætur af starfi sem liður í frekari skipulagsbreytingum sem taka gildi nú um mánaðamótin. Christina Siniscalchi hefur undanfarin rúman áratug gengt ýmsum stjórnunarstöðum á sviði gæðamála hjá Alvogen. Hún er nú framkvæmdastjóri gæðamála Alvogen.

„Við þökkum Söndru fyrir frábært framlag. Hún átti þátt í farsælli niðurstöðu úttektar Matvæla- og lyfjaeftirlits Bandaríkjanna (FDA) á framleiðsluaðstöðunni í Reykjavík, sem leiddi nýlega til samþykkis fyrir líftæknilyfjahliðstæðu okkar við Humira í Bandaríkjunum,“ sagði Róbert Wessman, stjórnarformaður og framkvæmdastjóri Alvotech. „Christina er öllum hnútum kunnug, þar sem hún býr að víðtækri reynslu á sviði lyfjaframleiðslu og þekkingu á regluverki iðnaðarins, eftir langt og farsælt starf fyrir systurfélag okkar, Alvogen. Það er fagnaðarefni að fá Christinu til liðs við okkur á þessum tímapunkti. Við vinnum nú hörðum höndum að því að auka framleiðslugetuna, til að styðja við vaxandi sókn á alþjóðlega markaði. Þungamiðja starfsins er áhersla á stöðugar úrbætur, öguð vinnubrögð, hámarks gæði og að uppylla jafnan ströngustu kröfur sem gerðar eru til framleiðslu líftæknilyfja.“

Christina Siniscalchi hefur starfað í bandaríska lyfjaiðnaðinum í aldarfjórðung. Áður en hún gekk til liðs við Norwich Pharmaceuticals, sem nú er hluti af Alvogen, vann hún hjá Mallinckrodt Pharmaceuticals. Hún er með meistaragráðu í lyfjaeftirlits- og gæðamálum frá Temple háskólanum í Fíladelfíu í Pennsylvaníufylki í Bandaríkjunum og BS gráðu í iðnaðarlíffræði frá Tækniháskóla Georgíufylkis í Atlanta.  

Um Alvotech

Alvotech, stofnað af Róberti Wessman, er líftæknifyrirtæki sem einbeitir sér að þróun og framleiðslu líftæknihliðstæðulyfja fyrir sjúklinga um allan heim. Alvotech stefnir að því að verða leiðandi fyrirtæki á sviði líftæknihliðstæðulyfja. Til að tryggja hámarksgæði eru allir þættir í þróun og framleiðslu í höndum fyrirtækisins. Alvotech vinnur meðal annars að þróun líftæknilyfjahliðstæða sem nýst geta sjúklingum með sjálfsofnæmis-, augn- og öndunarfærasjúkdóma, beinþynningu eða krabbamein. Alvotech hefur gert samninga um sölu, markaðssetningu og dreifingu við samstarfsaðila á öllum helstu mörkuðum, í Bandaríkjunum, Evrópu, Japan, Kína, öðrum hlutum Asíu,  Rómönsku-Ameríku, Afríku og Mið-Austurlöndum.  Meðal samstarfsaðila Alvotech eru Teva Pharmaceuticals, dótturfélag Teva Pharmaceutical Industries Ltd. (markaðsaðili í Bandaríkjunum), STADA Arzneimittel AG (Evrópa), Fuji Pharma Co., Ltd (Japan), Advanz Pharma (EES, Bretland, Sviss, Kanada, Ástralía og Nýja Sjáland), Cipla/Cipla Gulf/Cipla Med Pro (Ástralía, Nýja Sjáland, Afríka), JAMP Pharma Corporation (Kanada), Yangtze River Pharmaceutical (Group) Co., Ltd. (Kína), DKSH (Taívan, Hong Kong, Kambódía, Malasía, Singapore, Indonesía, Indland, Bangladess og Pakistan), YAS Holding LLC (Miðausturlönd og Norður Afríka), Abdi Ibrahim (Tyrkland), Kamada Ltd. (KMDA; Ísrael), Mega Labs, Stein, Libbs, Tuteur and Saval (Rómanska-Ameríka) og Lotus Pharmaceuticals Co., Ltd. (Taíland, Víetnam, Filippseyjar og Suður-Kórea).

Alvotech, fjárfestatengsl og samskiptasvið

Benedikt Stefánsson, forstöðumaður