Leiðrétting á heildarfjárhæð í tilkynningu um skuldabréfafjármögnun birt 2022-12-16 09:00 GMT

Í tilkynningu sem birtist í morgun kom fram að Alvotech hefði gengið frá fjármögnun í formi víkjandi skuldabréfa með breytirétti í almenn hlutabréf. Heildarfjárhæð er um 10 milljarðar króna (70 milljónir Bandaríkjadala) í stað um 8,5 milljarða (59,7 milljónir Bandaríkjadala). Eftirfarandi er leiðrétt tilkynning.

Alvotech gengur frá um 10 milljarða króna skuldabréfafjármögnun

Alvotech (NASDAQ: ALVO) tilkynnti í dag að fyrirtækið hefði gengið frá fjármögnun að fjárhæð um 10 milljarðar króna (u.þ.b. 70 milljónir Bandaríkjadala), miðað við núverandi gengi, í tveimur flokkum (flokkur A og flokkur B) í formi víkjandi skuldabréfa með breytirétti í almenn hlutabréf í Alvotech. 

Alvotech ætlar að nýta stærstan hluta fjármögnunarinnar til að gera upp um 7,1 milljarðs króna víkjandi lán (50 milljónir Bandaríkjadala) frá Alvogen, sem tilkynnt var um 16. nóvember sl. Í samræmi við skilmála Alvogen lánsins, falla áskriftarréttindi lánveitandans að 4% almennra hluta í Alvotech því niður.

Alvotech mun gefa út skuldabréf til 36 mánaða að heildarfjárhæð um 10 milljarðar króna, miðað við núverandi gengi, í formi víkjandi skuldabréfa með breytirétti yfir í almenn hlutabréf. Flokkur A er gefinn út í íslenskum krónum og ber 15% vexti á ársgrundvelli, sem bætast við höfuðstólinn á hverjum gjalddaga og ávaxtast (s.n. PIK vextir) en flokkur B er gefinn út í Bandaríkjadölum og ber 12,5% PIK vexti á ári.

Eigendur skuldabréfanna (fyrir bæði flokk A og flokk B) hafa rétt til þess að breyta upprunalegum höfuðstól auk áfallinna vaxta og ávöxtunar að hluta eða öllu leyti í almenn hlutabréf í Alvotech á föstu gengi, sem er 10 Bandaríkjadalir á hlut. Breytiréttinn má nýta að hluta eða öllu leyti þann 31. desember 2023 eða 30. júní 2024.  

Ráðgjafar Alvotech við útgáfuna voru Acro verðbréf, Arctica Finance, Arion banki og Landsbankinn. 

Um Alvotech

Alvotech, stofnað af Róberti Wessman stjórnarformanni fyrirtækisins, er líftæknifyrirtæki sem einbeitir sér að þróun og framleiðslu líftæknihliðstæðulyfja fyrir sjúklinga um allan heim. Alvotech stefnir að því að verða leiðandi fyrirtæki á sviði líftæknihliðstæðulyfja. Til að tryggja hámarksgæði eru allir þættir í þróun og framleiðslu í höndum fyrirtækisins. Alvotech vinnur að þróun átta líftæknilyfjahliðstæða sem nýst geta sjúklingum með sjálfsofnæmis-, augn- og öndunarfærasjúkdóma, beinþynningu eða krabbamein. Alvotech hefur gert samninga um sölu, markaðssetningu og dreifingu við samstarfsaðila á öllum helstu mörkuðum, í Bandaríkjunum, Evrópu, Japan, Kína, öðrum hlutum Asíu,  Rómönsku-Ameríku, Afríku og Mið-Austurlöndum.  Meðal samstarfsaðila Alvotech eru Teva Pharmaceuticals, dótturfélag Teva Pharmaceutical Industries Ltd. (markaðsaðili í Bandaríkjunum), STADA Arzneimittel AG (Evrópa), Fuji Pharma Co., Ltd (Japan), Cipla/Cipla Gulf/Cipla Med Pro (Ástralía, Nýja Sjáland, Afríka), JAMP Pharma Corporation (Kanada), Yangtze River Pharmaceutical (Group) Co., Ltd. (Kína), DKSH (Taívan, Hong Kong, Kambódía, Malasía, Singapore, Indonesía, Indland, Bangladess og Pakistan), YAS Holding LLC (Miðausturlönd og Norður Afríka), Abdi Ibrahim (Tyrkland), Kamada Ltd. (KMDA; Ísrael), Mega Labs, Stein, Libbs, Tuteur and Saval (Rómanska-Ameríka) og Lotus Pharmaceuticals Co., Ltd. (Taíland, Víetnam, Filippseyjar og Suður-Kórea).

Alvotech, fjárfestatengsl og samskiptasvið

Benedikt Stefánsson