Reginn hf. - Tilkynning um framkvæmd endurkaupaáætlunar

Aðalfundur Regins hf., sem haldinn var 14. mars 2019, veitti stjórn félagsins heimild til að kaupa allt að 182.624.396 eigin hluti í félaginu, en það jafngildir 10% af útgefnu hlutafé félagsins í þeim tilgangi að setja upp formlega endurkaupaáætlun.

Reginn hf. tilkynnti fyrst um framkvæmd endurkaupaáætlunar þann 6. júní 2019 og keypti félagið samkvæmt áætluninni samtals 21.929.825 eigin hluti að kaupverði 467.422.300 krónur, eða sem nemur 1,20% af útgefnu hlutafé í Reginn hf. Kaupum samkvæmt endurkaupaáætluninni lauk þann 30. september 2019.

Stjórn Regins hf. hefur á grundvelli framangreindrar heimildar frá aðalfundi tekið ákvörðun um að virkja aðra endurkaupaáætlun í þeim tilgangi að lækka útgefið hlutafé félagsins. Endurkaupin munu nema að hámarki 21.929.825 hlutum, þó þannig að heildarkaupverð verði ekki hærra en kr. 500.000.000, og að hámarki 1,20% af heildarhlutafé félagsins. Gert er ráð fyrir að endurkaup samkvæmt áætluninni hefjist 8. janúar 2020 og ljúki í síðasta lagi 4. mars 2020.

Framkvæmd endurkaupaáætlunarinnar verður í samræmi við lög um hlutafélög nr. 2/1995 og viðauka við reglugerð um innherjaupplýsingar og markaðssvik nr. 630/2005.

Kaup samkvæmt endurkaupaáætluninni verða framkvæmd í áföngum, þó þannig að kaup hvers dags munu að hámarki nema 1.786.164 hlutum, eða sem nemur 25% af meðaltali daglegra viðskipta með hlutabréf í félaginu á Aðalmarkaði Kauphallar Íslands hf. í desember 2019. Endurgjald fyrir keypta hluti skal ekki vera hærra en sem nemur verði síðustu óháðu viðskipta eða hæsta fyrirliggjandi óháða kauptilboði í þeim viðskiptakerfum þar sem viðskipti með hlutina fara fram, hvort sem er hærra.

Markaðsviðskipti Landsbankans hf. munu hafa umsjón með framkvæmd endurkaupaáætlunarinnar og taka allar viðskiptaákvarðanir er varða kaup á hlutum og tímasetningu kaupanna óháð félaginu.

Viðskipti félagsins með eigin hluti á grundvelli endurkaupaáætlunarinnar verða tilkynnt eigi síðar en við lok sjöunda viðskiptadags eftir að viðskiptin fara fram.

Reginn hf. á 21.929.825 eigin hluti áður en endurkaup samkvæmt endurkaupaáætluninni hefjast.

Nánari upplýsingar

Helgi S. Gunnarsson – Forstjóri –  – S: 512 8900 / 899 6262