Reginn hf.: Undirritun viljayfirlýsingar Regins hf., Haga hf., og Klasa ehf. um uppbyggingu og rekstur á fasteignaþróunarfélagi

Reginn hf. hefur í dag, 24. september 2021, undirritað viljayfirlýsingu við Haga hf., Klasa ehf. og KLS eignarhaldsfélag ehf., núverandi eigenda Klasa ehf., um uppbyggingu og rekstur öflugs fasteignaþróunarfélags. Reginn hf. og Hagar hf. munu ganga í eigendahóp Klasa ehf. að undangenginni hlutafjáraukningu í hinu síðastnefnda félagi. Viljayfirlýsing þessi er í samræmi við áður kynnt áform Regins hf. um umbreytingu og þróun eignasafns félagsins þ.m.t. þátttöku í öflugu fasteignaþróunarfélagi. Í því sambandi er vísað til fjárfestakynningar Regins hf., dags. 10. febrúar 2021.

Samkvæmt viljayfirlýsingunni er áætlað að eignarhlutur hvers eiganda um sig, þ.e. Regins hf., Haga hf. og KLS eignarhaldsfélags ehf. verði um 1/3 af útgefnu hlutafé. Reginn hf. og Hagar hf. munu greiða fyrir eignarhlut sinn með þróunareignum. Til þróunareigna Regins hf. teljast lóðir til uppbyggingar, eignir sem eru utan skilgreindra kjarnasvæða félagsins og aðrar eignir sem henta ekki núverandi eignasafni miðað við fyrirliggjandi fjárfestingastefnu. Samhliða fyrirhugaðri fjárfestingu Regins hf. og Haga hf. í Klasa ehf. mun Klasa ehf. verða skipt upp þannig að verkefni Klasa ehf. sem ekki teljast til þróunarverkefna færast í annað félag utan fyrirhugaðra viðskipta. Viljayfirlýsingin er með fyrirvörum m.a. um áreiðanleikakönnun og samþykki Samkeppniseftirlitsins.

Áætluð verðmæti undirliggjandi fjárfestingaeigna Klasa ehf. eftir fyrirhuguð viðskipti verða um 15 ma.kr. Eiginfjárhlutfall félagsins í upphafi er áætlað um 70%.

Eðli og tilgangur fyrirhugaðra viðskipta er að Klasi ehf. þrói áfram þær fasteignir og lóðir sem Reginn hf. og Hagar hf. leggja til við kaup á nýju hlutafé í Klasa ehf. Félögin hafa innan eignasafna sinna umfangsmikil og fjölmörg fasteignaþróunarverkefni sem henta betur til þróunar, uppbyggingar og sölu innan sérhæfðs fasteignaþróunarfélags. Einnig mun Klasi þróa þau verkefni sem eru áfram í félaginu. Aðilar telja að með þessu náist fram aukin verðmæti þróunareigna með þekkingu Klasa ehf. á skipulags- og fasteignaþróun.

Klasi ehf. er þekkingarfyrirtæki í þróun fasteigna og hefur í yfir 17 ár komið að mörgum viðamiklum fasteignaþróunarverkefnum og framkvæmdaverkefnum.

Reginn hf. er fasteignafélag sem fjárfestir í, leigir út og annast rekstur á atvinnuhúsnæði. Þrátt fyrir að fasteignaþróun hafi verið umfangsmikil innan félagsins undanfarin ár er hún ekki hluti af kjarnastarfsemi Regins hf.

Með fyrirhuguðum viðskiptum skapast ný tækifæri fyrir Reginn hf. til að styrkja fasteignasafn sitt innan nýrra kjarnasvæða, svo sem á fyrirhuguðum uppbyggingarsvæðum á Borgarhöfða og Mjódd, í samræmi við sýn og stefnu félagsins.

Bent er á að Tómas Kristjánsson, stjórnarformaður Regins hf., er jafnframt annar aðaleigandi Klasa ehf. Í samræmi við ákvæði laga og starfsreglur stjórnar Regins hf. hefur Tómas ekki haft aðgang að upplýsingum vegna málsins eða tekið þátt í undirbúningi, meðferð eða ákvörðun þess innan stjórnar Regins hf.   

Ráðgjafi Regins hf. í viðskiptunum er Fyrirtækjaráðgjöf Landsbankans hf.

Nánari upplýsingar:

Helgi S. Gunnarsson – Forstjóri –  – S: 512 8900 / 899 6262