REITIR: Rammasamningur um uppbyggingu fimm hjúkrunarheimila og verksamningur um uppbyggingu þess fyrsta.
Reitir fasteignafélag og fasteignaþróunarfélagið Íslenskar fasteignir hafa undirritað rammasamning um uppbyggingu fimm hjúkrunarheimila með samtals um 400-600 rýmum á næstu árum. Heildarumfang samstarfsins gæti numið 24 til 36 milljörðum króna. Staðsetningar og útfærsla hjúkrunarheimila verður í samræmi við stefnu og kröfur stjórnvalda um uppbyggingu hjúkrunarheimila á komandi árum.
Samkvæmt samkomulaginu munu Reitir fjármagna framkvæmdir hjúkrunarheimilanna og verður eigandi þeirra, en Íslenskar fasteignir mun hafa umsjón með hönnun þeirra og annast byggingarstjórnun á framkvæmdatíma.
Samhliða rammasamningi hafa aðilar gert með sér samkomulag um þróun og byggingu fyrsta hjúkrunarheimilisins. Um er að ræða allt að 7.000 fermetra byggingu með 80 til 100 rýmum sem hönnuð verður samkvæmt viðmiðum heilbrigðisráðuneytisins. Reiknað er með að uppbyggingu hjúkrunarheimilisins verði lokið 2026. Nýtt byggingafélag verður stofnað um uppbyggingu hjúkrunarheimilisins sem verður í eigu samningsaðila. Að uppbyggingu lokinni munu Reitir kaupa fasteignina.
Guðni Aðalsteinsson, forstjóri Reita:
„Með samningnum er stigið stórt skref í þeirri stefnu félagsins að taka þátt í mikilvægri innviðauppbyggingu á Íslandi og liður í þeirri stefnu okkar að stækka eignasafn Reita.
Samkomulagið er jafnframt í takt við fyrirætlanir stjórnvalda, en skv. skýrslu vinnuhóps Fjármála- og Heilbrigðisráðuneytis um breytt fyrirkomulag fasteigna vegna hjúkrunarheimila, sem kom út fyrr á árinu, er gert ráð fyrir þörf á byggingu a.m.k. 90-100 hjúkrunarrýma á ári fram til ársins 2034.
Við hjá Reitum fögnum tækifærinu til að leggja lóð á vogarskálarnar í þessu samfélagslega mikilvæga verkefni og finnum til ábyrgðar, enda aðkallandi að fjölga hjúkrunarrýmum hratt en ekki síður að vanda vel til verka.„
Sveinn Björnsson, framkvæmdastjóri Íslenskra fasteigna:
„Við hlökkum til að takast á við þetta umfangsmikla verkefni. Framundan er náið samstarf við ríki og sveitarfélög um val á staðsetningum og hönnun hjúkrunarheimilanna þannig að gæði heimilanna og þjónusta þeirra verði með sem bestum hætti fyrir íbúa hjúkrunarheimilanna, starfsfólks þeirra og nærliggjandi samfélags.“
Samningarnir eru gerðir með fyrirvara um samþykki stjórnar Reita fasteignafélags.
Um Reiti fasteignafélag
Reitir er leiðandi fyrirtæki í fasteignaþróun ásamt rekstri og eignarhaldi atvinnuhúsnæðis. Vöxtur Reita byggir á þróun og fjárfestingu í borgarinnviðum sem styðja við sjálfbært samfélag.
Innan eignasafns Reita eru um 460 þúsund fermetrar atvinnuhúsnæðis sem hýsir fjölbreytta atvinnustarfsemi og ríkisstofnanir. Gagnkvæmur ávinningur Reita, samstarfsaðila og samfélags er lykilþáttur í starfsemi Reita. Fyrirtækið er almenningshlutafélag skráð í Kauphöll síðan 2015. Eigendur eru að stærstum hluta íslenskir lífeyrissjóðir.
Um Íslenskar fasteignir
Íslenskar fasteignir ehf. er fasteignaþróunarfélag með yfirgripsmikla reynslu af umsjón verkþátta á mismunandi stigum fasteignaverkefna og hafa starfsmenn ÍF áratuga reynslu af flóknum og viðamiklum fasteignaverkefnum. Meðal þekktra verkefna sem félagið hefur annast á síðustu árum er uppbygging íbúða við Austurhöfn og Edition hótelsins í miðborg Reykjavíkur. Íslenskar fasteignir eru í eigu Íslenskrar fjárfestingar ehf., Gunnars Thoroddsen og Sveins Björnssonar.
Nánari upplýsingar veitir Guðni Aðalsteinsson, forstjóri, í netfanginu eða í síma 575 9000 og 624 0000.
