Eik fasteignafélag hf.: Kaupsamningur undirritaður vegna kaupa á öllu hlutafé í Festingu hf.
Í dag hefur Eik fasteignafélag hf. („Eik“ eða „félagið“) undirritað kaupsamning um kaup á öllu hlutafé í Festingu hf. en félagið tilkynnti þann 28. nóvember 2024 um samkomulag um einkaviðræður vegna kaupanna. Seljendur eru Blue Ocean B.V. og SMT Partners B.V.
Fasteignir Festingar á Íslandi eru um 43 þúsund fermetrar að stærð í 12 fasteignum og hýsa starfsemi Samskipa hf. á Íslandi. Fasteignirnar eru að stærstum hluta staðsettar í Reykjavík en einnig á Akureyri, Dalvík, Egilsstöðum, Ísafirði og Vestmannaeyjum. Stærsta eignin er um 28.500 fermetra vöruhús Samskipa í Kjalarvogi 7-15. Undanskilið í kaupunum eru dótturfélög Festingar í Noregi og Færeyjum sem eiga einnig fasteignir sem nýttar eru í starfsemi Samskipa. Leigusamningar um eignirnar verða til 20 ára frá og með afhendingu á hlutafé Festingar.
Heildarvirði Festingar í kaupunum (e. Enterprise Value) er 15.070 m.kr. sem er 230 m.kr. lækkun frá fyrri tilkynningu sem skýrist af breyttu formi leigusamninga fasteigna utan höfuðborgarsvæðisins og fyrirhugaðri fjárfestingu í fasteignum Festingar. Ráðgert er að kaupin verði fjármögnuð að stórum hluta með lánsfé.
Eik áætlar að áhrif á EBITDA félagsins verði á bilinu 1.130 – 1.140 m.kr. á ársgrundvelli m.v. vísitölu neysluverðs til verðtryggingar í júní 2025.
Hreiðar Már Hermannsson, forstjóri Eikar fasteignafélags:
„Fasteignir Festingar tilheyra mikilvægum innviðum í samfélaginu og því er ánægjulegt að Eik og seljendur hafi náð saman með undirritun kaupsamnings. Samskip er og verður nauðsynlegur hluti af íslensku samfélagi og hlökkum við til samstarfsins um ókomna framtíð. Eik fasteignafélag vill fjárfesta með atvinnulífinu og við komumst varla nær kjarna þess en með þessum viðskiptum.“
Ólafur Ólafsson, stjórnarformaður Festingar og aðaleigandi:
„Við erum stolt af því að hafa gengið frá samningi um sölu á Festingu hf. og þeim fasteignum sem félagið hefur byggt upp á síðustu tuttugu árum. Eignirnar, sem að stærstum hluta styðja við starfsemi Samskipa, eru bæði vandaðar og vel staðsettar, og teljast til fremstu innviða fyrir sjó- og landflutninga á Íslandi. Að lokinni sölu munu hluthafar Festingar beina kröftum sínum að þróun nýrrar hafnaraðstöðu í Rotterdam ásamt því að styðja við áframhaldandi uppbyggingu leiðakerfis Samskipa í Evrópu. Það gleður okkur að Eik – öflugt, framsækið og faglegt fasteignafélag – muni taka við Festingu. Við væntum góðs samstarfs við Eik til framtíðar.“
Kaupin eru gerð með skilyrðum, þ.m.t. samþykki Samkeppniseftirlitsins og annarra hagaðila.
Ráðgjafar Eikar fasteignafélags í viðskiptunum eru fyrirtækjaráðgjöf Arctica Finance hf. og Venture Legal ehf. Ráðgjafar seljenda er fyrirtækjaráðgjöf Íslandsbanka og LOGOS.
Nánari upplýsingar veitir:
Hreiðar Már Hermannsson, forstjóri, , s. 856-5907
