Eik fasteignafélag hf.: Árshlutauppgjör fyrstu sex mánuði ársins 2021

• Rekstrartekjur námu 4.162 m.kr.
• Virðisrýrnun viðskiptakrafna nam 80 m.kr.
• Rekstrarhagnaður fyrir matsbreytingu, söluhagnað og afskriftir nam 2.700 m.kr.
• Heildarhagnaður nam 2.306 m.kr.
• Handbært fé frá rekstri nam 1.492 m.kr.
• Bókfært virði fjárfestingareigna nam 101.408 m.kr. í lok tímabilsins.
• Bókfært virði eigna til eigin nota nam 4.060 m.kr. í lok tímabilsins.
• Matsbreyting fjárfestingareigna var 2.535 m.kr.
• Handbært fé nam 3.141 m.kr.
• Vaxtaberandi skuldir námu 64.333 m.kr. í lok tímabilsins.
• Eiginfjárhlutfall nam 31,4%.
• Hagnaður á hlut var 0,68 kr.
• Virðisútleiguhlutfall var 93% í lok tímabilsins
• Vegnir verðtryggðir vextir námu 3,06% í lok tímabilsins.
• Vegnir óverðtryggðir vextir námu 3,45% í lok tímabilsins.

Árshlutareikningur Eikar fasteignafélags hf. fyrir tímabilið 1. janúar til 30. júní 2021 var samþykktur af stjórn og forstjóra félagsins þann 25. ágúst 2021.

Meðfylgjandi er árshlutaskýrsla sem inniheldur árshlutareikning vegna fyrstu sex mánaða ársins ásamt ítarlegri upplýsingum um rekstur félagsins en fram koma í tilkynningunni.

Rekstur félagsins

Rekstur félagsins gekk vel á fyrstu sex mánuðum ársins 2021 og var afkoman yfir áætlunum stjórnenda félagsins. Rekstrartekjur félagsins á fyrstu sex mánuðum ársins 2021 námu 4.162 m.kr. Þar af voru leigutekjur 3.789 m.kr. Rekstrarhagnaður fyrir matsbreytingu, söluhagnað og afskriftir nam 2.700 m.kr. og jókst um 8,3% á milli ára. Hagnaður fyrir tekjuskatt nam 2.878 m.kr. og heildarhagnaður samstæðunnar á fyrstu sex mánuðum ársins 2021 nam 2.306 m.kr.

NOI hlutfall (þ.e. rekstrarhagnaður fyrir matsbreytingu og afskriftir sem hlutfall af leigutekjum) nam 71,4% á fyrstu sex mánuðum ársins 2021 samanborið við 67,7% fyrir sama tímabil 2020.

Fjárfestingareignir félagsins eru metnar á gangvirði í samræmi við alþjóðlega reikningsskilastaðla (IFRS) og stuðst er m.a. við núvirt framtíðarsjóðstreymi einstakra eigna. Breytingar á gangvirði eru færðar undir matsbreytingu fjárfestingareigna sem voru um 2.535 m.kr. á fyrstu sex mánuðum ársins.

Efnahagur félagsins

Heildareignir félagsins námu 110.874 m.kr. þann 30. júní 2021. Þar af eru fjárfestingareignir að virði 101.408 m.kr. sem skiptast í fjárfestingareignir í útleigu að fjárhæð 97.953 m.kr., leigueignir 2.299 m.kr., fjárfestingareignir í þróun 696 m.kr., byggingarréttir og lóðir 447 m.kr. og fyrirframgreidd gatnagerðargjöld að fjárhæð 13 m.kr. Eignir til eigin nota námu 4.060 m.kr. og fasteignir í þróun 659 m.kr. Eigið fé félagsins nam 34.855 m.kr. í lok júní 2021 og var eiginfjárhlutfall 31,4%. Heildarskuldir félagsins námu 76.018 m.kr. þann 30. júní 2021, þar af voru vaxtaberandi skuldir 64.333 m.kr. og tekjuskattsskuldbinding 8.017 m.kr. 

Virðisútleiguhlutfall

Virðisútleiguhlutfall félagsins hækkaði um 1% frá áramótum og var 93% í lok fyrri hluta ársins.

Uppfærðar horfur og áhrif vegna COVID-19

Félagið birti uppfærðar horfur þann 10. ágúst síðastliðinn og er aðlöguð EBITDA afkomuspá fyrir árið 2021 nú á bilinu 5.400 – 5.700 m.kr. miðað við verðlag frá júlí 2021.

Áhrif COVID-19 á rekstur félagsins eru enn sýnileg. Félagið áætlar að bein áhrif COVID-19 hafi verið á bilinu 150-160 m.kr. á fyrstu sex mánuðum ársins og má rekja þau fyrst og fremst til ferðaþjónustufyrirtækja. Áhrifin sjást vel í virðisrýrnun viðskiptakrafna og á rekstri Hótels 1919. Líkur eru á því að faraldurinn muni hafa áhrif á rekstur félagsins næstu misserin, en óljóst er til hve langs tíma.

Fjármögnun

Félagið gaf út tvo nýja skuldabréfaflokka í mars, EIK 23 1 og EIK 100327. Seldar voru 1.200 m.kr. að nafnverði í skuldabréfaflokknum EIK 23 1 sem ber 2,9% óverðtryggða vexti og var flokkurinn tekinn til viðskipta á Aðalmarkað Nasdaq Iceland þann 18. maí síðastliðinn. Þá voru seldar 2.200 m.kr. að nafnverði í skuldabréfaflokknum EIK 100327 í mars sem ber 1,45% verðtryggða vexti og í maí var flokkurinn stækkaður um 800 m.kr. á ávöxtunarkröfunni 1,25%.

Skuldabréfaflokkurinn EIK 15 1, sem bar 3,3% vexti, var greiddur upp í mars síðastliðnum. Uppgreiðslan var fjármögnuð að fullu með óverðtryggðu bankaláni.

Vegnir verðtryggðir vextir námu 3,06% í lok fjórðungsins og vegnir óverðtryggðir vextir 3,45%. 

Eignasafn félagsins

Félagið hefur selt Hafnarstræti 4 í miðbæ Reykjavíkur og Fjölnisgötu 3b á Akureyri. Báðar eignirnar voru afhentar á öðrum ársfjórðungi. Þá keypti félagið rúmlega 200 fermetra rými í Síðumúla 15, en fyrir kaupin átti félagið Síðumúla 13 og hluta af Síðumúla 15.

Kauptilboð félagsins í hluta eignarinnar við Sóltún 24 hefur verið samþykkt og er unnið að því að aflétta fyrirvörum. Eignin deilir lóð og bílakjallara með eign félagsins við Sóltún 26. Þá hefur félagið samþykkt kauptilboð í eign sína við Kirkjubraut 28 á Akranesi og er einnig unnið að því að aflétta fyrirvörum á því.

Fasteignir innan samstæðunnar eru rúmlega 100 talsins og telja rúmlega 310 þúsund útleigufermetra í rúmlega 600 leigueiningum. Heildarfjöldi leigutaka er yfir 400. Helstu fasteignir félagsins á höfuðborgarsvæðinu eru Borgartún 21 og 21a, Borgartún 26, Suðurlandsbraut 8 og 10, Mýrargata 2-16, Pósthússtræti 2 (Hótel 1919), Smáratorg 3 (Turninn), Smáratorg 1, Álfheimar 74 (Nýi Glæsibær), Grjótháls 1-3 og Austurstræti 5, 6, 7 og 17. Helsta fasteign félagsins utan höfuðborgarsvæðisins er Glerártorg. Stærstu leigutakar félagsins eru Húsasmiðjan, Flugleiðahótel, Ríkiseignir, Rúmfatalagerinn, Sýn, Landsbankinn, Össur, Míla, Síminn og Deloitte.

Stærsti hluti fasteignasafns Eikar er skrifstofuhúsnæði eða 45%. Næst koma verslunarhúsnæði 24%, lagerhúsnæði 13%, hótel 10%, heilsutengt húsnæði 5% og veitinga- og skemmtistaðir 3%. Um 92% fasteigna félagsins eru á höfuðborgarsvæðinu, þar af 38% á fjármála- og viðskiptasvæði Reykjavíkur (aðallega innan póstnúmera 105 og 108), 19% í Smáranum - Mjódd og 17% í miðbæ Reykjavíkur. 8% eignasafnsins er á landsbyggðinni, þar af tæplega 7% á Akureyri.

Rafrænn kynningarfundur

Rafrænn kynningarfundur verður haldinn fimmtudaginn 26. ágúst 2021 klukkan 8:30. Garðar Hannes Friðjónsson, forstjóri og Lýður H. Gunnarsson, framkvæmdastjóri fjármálasviðs, munu kynna uppgjörið og svara spurningum að lokinni kynningu.

Skráning á fundinn fer fram hér:

Eftir skráningu fá þátttakendur tölvupóst með nánari upplýsingum. 

Fjárhagsdagatal 2021

Stefnt er að birtingu árshluta- og ársuppgjöra á neðangreindum dagsetningum:

Árshlutauppgjör 3. ársfjórðungs 2021                                   28. október 2021

Stjórnendauppgjör 2021 og áætlun 2022                             11. febrúar 2022

Ársuppgjör 2021                                                                    3. mars 2022

Nánari upplýsingar veitir:

Garðar Hannes Friðjónsson, forstjóri, , s. 590-2200

Lýður H. Gunnarsson, framkvæmdastjóri fjármálasviðs, , s. 820-8980

Viðhengi