Brim semur um 33 milljarða króna sjálfbærnitengt sambankalán
Brim semur um 33 milljarða króna sjálfbærnitengt sambankalán
Brim hf. hefur undirritað samning um 33 milljarða króna sambankalán til að endurfjármagna eldra lán. Lánveitendur eru þrír alþjóðabankar; alþjóðlegi matvæla- og landbúnaðarbankinn Rabobank, norræni Nordea bankinn og norski DNB bankinn. Lánið er til fimm ára með 25 ára afborgunarferli. Í lánaskilmálum eru hvatar til aukinnar sjálfbærni þar sem skilgreindir eru árangursvísar á sviði umhverfis- og samfélagsmála og í samræmi við stefnu og markmið Brims, en félagið hefur birt slíkar upplýsingar samkvæmt GRI staðlinum frá 2017. Árangursvísarnir taka m.a. til losunar gróðurhúsalofttegunda tengt veiðum og er Brim frumkvöðull í slíkri upplýsingagjöf á heimsvísu. Rabobanki er umsjónaraðili sjálfbærniþátta lánsins. Lánakjörin eru góð og staðfesta fjárhagslegan styrk Brims, ábyrgar fjárfestingar undanfarin ár og góða rekstrarsögu.
Inga Jóna Friðgeirsdóttir, fjármálastjóri Brims hf:
"Við hjá Brimi erum ánægð með nýja sambankalánið sem er að okkar mati á góðum kjörum. Lánveitendurnir eru viðurkenndar alþjóðlegar fjármálastofnanir með mikla reynslu af viðskiptum við evrópska matvælaframleiðendur. Lánið staðfestir tiltrú alþjóðafjármálamarkaðarins á fjárhagsstyrk Brims, sjálfbærum veiðum og vinnslu okkar á hágæða sjávarafurðum. Við erum sérstaklega ánægð með hvatana til aukinnar sjálfbærni sem felast í lánaskilmálunum en þeir styðja við markmið okkar um aukna verðmætasköpun, lækkun kolefnisspors og aukið öryggi í framleiðslu og dreifingu afurða félagsins um allan heim."
Guðmundur Kristjánsson, forstjóri Brims hf:
"Ég er mjög sáttur því lánaskilmálar undirstrika traustan efnahag Brims og góðan rekstur. Þessi 33 milljarða fjármögnun gerir okkur kleift að endurskipuleggja fjárhaginn og undirbúa tæknivædda framtíð. Við getum nýtt aukinn fjárhagsstyrk til að hraða okkar stefnumálum sem eru að bæta nýtingu veiðiheimilda, auka sjálfbærni, efla markaðs- og sölustarf og auka verðmætasköpun og arðsemi."
Rabobank og Nordea eru með jafnstóran hlut í láninu en DNB er með lægri hlutdeild. Íslandsbanki er umsjónar- og veðgæsluaðili lánsins. Þessi þrír alþjóðabankar eru leiðandi bankar í þjónustu við sjávarútveg í Evrópu og um heim allan. Allir bankarnir hafa mótað skýra sýn til að ná markmiðum á sviði sjálfbærrar þróunar.
Reykjavík 15. júní, 2023
