Ákvörðun Samkeppniseftirlitsins skaðleg neytendum – Síminn áfrýjar

Samkeppniseftirlitið birti fyrr í dag ákvörðun sína nr. 25/2020. Þar er Síminn talinn hafa brotið ákvarðanir eftirlitsins frá 2015 og skuli Síminn greiða stjórnvaldssekt að upphæð 500 m.kr.

Síminn telur að félagið hafi ekki gerst brotlegt við umræddar ákvarðanir og mun kæra ákvörðunina til áfrýjunarnefndar samkeppnismála. Síminn telur ákvörðunina ekki aðeins mikil vonbrigði heldur einnig skaðlega fyrir samkeppni í landinu.

Að mati Símans skýtur skökku við, nú þegar loks er til staðar hörð samkeppni um sýningar á íþróttaefni hér á landi, að Samkeppniseftirlitið telji rétt að beita Símann háum fjársektum vegna sams konar pakkatilboða og tíðkuðust yfir áratugaskeið af þeim aðila sem hefur verið markaðsráðandi á áskriftarsjónvarpsmarkaði um árabil, 365 (nú Sýn), en þetta mál er einmitt tilkomið vegna kvörtunar Sýnar.

Í ákvörðuninni felst ekki að Síminn hafi brotið gegn samkeppnislögum heldur er Síminn talinn hafa brotið að formi til gegn tilteknum skilyrðum í tilteknum ákvörðunum Samkeppniseftirlitsins frá fyrri árum. Á meint brot að hafa falist í því að Síminn bauð enska boltann á of góðum kjörum að mati Samkeppniseftirlitsins, inn í pakkatilboðum.

Samkeppniseftirlitið hefur ítrekað ákveðið að sama háttsemi Sýnar og áður 365 miðla væri ekki athugaverð. Gat Síminn því ekki annað en verið í góðri trú um verðlagningu á umræddri þjónustu félagsins. 

Verð á enska boltanum hefur ekki aðeins lækkað til neytenda eftir að Síminn tók við sýningarréttinum heldur hafa fleiri heimili aðgang að þjónustunni en nokkru sinni fyrr. Annað íþróttaefni sem aðrir bjóða upp á hefur einnig lækkað á sama tíma, væntanlega vegna aukinnar samkeppni frá Símanum, sem hefur verið neytendum til hagsbóta en ekki skaða.

Þegar Síminn hóf undirbúning að sýningum frá ensku úrvalsdeildinni var horft til þess að gera vöruna sem aðgengilegasta öllum á sem besta mögulega verði. Það gekk eftir enda Síminn Sport aðgengileg á öllum dreifikerfum landsins, gömlum sem nýjum og opin öllum áskrifendum óháð því hvar viðkomandi kýs að hafa fjarskiptaþjónustu sína.

Neytendur hér á landi hafa aldrei áður haft jafn greiðan aðgang að enska boltanum, á jafn hagkvæmu verði. Það kann nú að breytast því ákvörðun Samkeppniseftirlitsins virðist við fyrstu skoðun geta leitt til þess að Símanum verði nauðugur einn kostur að hækka verð á sjónvarpsefni.

Þessi ákvörðun Samkeppniseftirlitsins mun hafa neikvæð áhrif á afkomu Símans þar sem sektin verður gjaldfærð á öðrum ársfjórðungi. Ný EBITDA spá Símans fyrir árið 2020 er 9,9 – 10,3 milljarðar króna að teknu tilliti til ákvörðunarinnar.

Nánari upplýsingar veitir :

Orri Hauksson, forstjóri Símans, s. 550-6003 ( )

Guðmundur Jóhannsson, samskiptafulltrúi Símans, ()eða GSM 895 1977