Síminn hf. - Nýtt skipurit og uppfærð stefna

Í dag tekur gildi nýtt skipurit Símans hf. en breytingunum er ætlað að leggja aukna áherslu á vöruþróun og upplifun viðskiptavina á einstaklings- og fyrirtækjamarkaði með því að skerpa á starfsemi sviða og samvinnu þeirra á milli. 

Sviðinu Sala og þjónusta hefur verið skipt upp og tvö öflug tekjusvið verða til, Einstaklingssvið og Fyrirtækjasvið. Á báðum sviðum verða teymi viðskiptaþróunar og vörustýringar en þau munu gegna lykilhlutverki við þróun og vörustýringu fjarskipta- og tæknilausna sem mæta þörfum einstaklinga og fyrirtækja. Áður tilheyrði vörustýring sviði Tækniþróunar.

Fyrirtækjasvið verður leitt af Vésteini Gauta Haukssyni sem stýrði sviðinu Auglýsingamiðlun sem nú sameinast hinu nýja Fyrirtækjasviði. Þar með verða allar einingar innan Símans hf. sem starfa á fyrirtækjamarkaði undir einum hatti sem mun styðja við skilvirkni og samræmda nálgun í sölu og þjónustu. Lögð verður aukin áhersla á samvinnu Fyrirtækjasviðs og dótturfélagsins Radíómiðunar, en Radíómiðun hefur um árabil verið leiðandi í þróun fjarskiptalausna fyrir sjávarútveg og sérhæfðra lausna á sviði hlutaneta (e. IoT) fyrir aðrar atvinnugreinar, til að mynda fiskeldi, iðnað og flutninga.

Einstaklingssvið verður leitt af Berglindi Björgu Harðardóttur sem áður stýrði Sölu og þjónustu. Með tilkomu Einstaklingssviðs verður ríkari áhersla lögð á fjölbreytt vöruframboð sem mætir þörfum viðskiptavina Símans á einstaklingsmarkaði. Þá verður sérstök áhersla lögð á upplifun viðskiptavina með bættum þjónustuferlum, umbótum og nýjum vörum sem munu byggja á gagnadrifinni nálgun.

Samhliða uppfærðu skipuriti tekur einnig gildi ný og uppfærð stefna þar sem framtíðarsýn, hlutverk og lykilmarkmið félagsins hafa verið uppfærð og er uppfærðu skipuriti ætlað að styðja við þau markmið sem þar eru sett fram. Kjarni nýrrar stefnu er að marka framtíð Símans sem stafræns þjónustufyrirtækis sem skapar verðmætar tengingar fyrir fólk og fyrirtæki á hinum ýmsu sviðum daglegs lífs.

María Björk Einarsdóttir, forstjóri Símans hf.:

„Markmið þessara breytinga eru skýr, að mæta þörfum viðskiptavina okkar á einstaklings- og fyrirtækjamarkaði enn betur með skapandi lausnum og þjónustu, auk þess að leggja aukna áherslu á viðskiptavinamiðaða nálgun í vöruþróun og upplifun. Við búum yfir einstökum mannauði og höfum staðið fyrir stöðugri nýsköpun í 119 ár. Þessar breytingar og þær metnaðarfullu áherslur sem við höfum sett okkur í kjölfar stefnumótunar síðustu mánuði gera okkur vel í stakk búin fyrir næsta kafla í sögu félagsins.“