SKEL fjárfestingafélag hf.: SKEL selur 15,4% hlutafjár í Styrkás fyrir 3.150 milljónir króna til stofnanafjárfesta

SKEL hefur undirritað kaupsamninga gagnvart innlendum stofnanafjárfestum um kaup þeirra á 153,9 milljónum hluta í Styrkási hf., eða því sem nemur ríflega 15,4% af útgefnu hlutafé félagsins. Kaupverð hlutanna er samtals er 3.150 m.kr. en það samsvarar 20,47 kr. á hlut. Söluverðið jafngildir bókfærðu virði eignarhlutar SKEL í Styrkás þann 31.12.2024. Kaupsamningarnir eru háðir hefðbundnum fyrirvörum sem gert er ráð fyrir að verði frágengnir í næstu viku. 

Styrkás er þjónustufyrirtæki við atvinnulífið. Dótturfélög Styrkás starfa á sviði orku og efnavöru undir vörumerki Skeljungs, tækja og búnaðar undir vörumerki Kletts og eignaumsýslu undir vörumerki Stólpa.

Kaupendur að hlutunum í Styrkási eru VÍS tryggingar hf., Íslandssjóðir, Birta lífeyrissjóður („Birta“), Íslenski lífeyrissjóðurinn og Lífeyrissjóður starfsmanna ríkisins („LSR“). Samhliða kaupunum hefur Horn IV slhf., fagfjárfestasjóður í rekstri Landsbréfa, flutt hluti sína í Styrkás hf. milli sjóða, í SÁ Horn slhf. („SÁ Horn“). Fjárfesting og eignarhald LSR, Birtu og Íslenska lífeyrisjóðsins í Styrkás verður sömuleiðis í gegnum SÁ Horn.

Að loknum viðskiptunum eru hluthafar Styrkás 19 talsins. Stærsti hluthafi félagsins er SKEL fjárfestingafélag hf. með 47,9%, SÁ Horn með 39,2%, Máttarstólpi, eignarhaldsfélag Ásgeirs Þorlákssonar með 8,7% og aðrir með 4,2%. Bókfært virði hlutafjár SKEL í Styrkási að viðskiptunum loknum 9.819 m.kr. 

SKEL kynnti fyrirhugaða sölu hlutafjár í Styrkási fyrir fjárfestum í fjárfestakynningu í febrúar síðastliðinn. Í kynningu kom fram að markmið SKEL væri að fá horsteinsfjárfesta inn í hluthafahóp Styrkáss í aðdraganda skráningar félagsins og að Styrkás yrði ekki í meirihluta eigu SKEL til lengri tíma, heldur í dreifðara eignarhaldi. Söluandvirðinu verður ráðstafað til niðurgreiðslu skulda og til að styrkja eiginfjárstöðu SKEL.

Ásgeir Helgi Reykfjörð Gylfason, forstjóri SKEL:

„Innkoma fleiri stofnanafjárfesta í hóp hluthafa Styrkás er stór áfangi fyrir félagið en við höfum lagt mikið kapp á að breikka hluthafahópinn. Þeir aðilar sem nú mynda hluthafahóp Styrkáss eru meðal umsvifamestu fjárfesta hérlendis og okkur þykir afar ánægjulegt að fá þá með í að efla félagið og gera að leiðandi þjónustufyrirtæki á fyrirtækjamarkaði, með styrk til að þjónusta þá innviða- og atvinnuvegafjárfestingu sem er framundan á Íslandi.“

Ráðgjafar voru ACRO verðbréf hf. og Beljandi lögmannsstofa.

Nánari upplýsingar veitir Ásgeir Helgi Reykfjörð Gylfason forstjóri,